traballo

Preguiza e desigualdade

Novembro 17th, 2017  |  Published in| the_category economía, globalizacion, neoliberalismo, traballo

Segundo afirma o presidente da CEOE, Juan Rosell, nunha entrevista que lle fai o Faro de Vigo: “temos unha lexislación que te empurra a facer horas en negro”. E engade, que non se poden subir os salarios porque non medra a produtividade, xa que os traballadores/as carecen da formación necesaria, culpando desta eiva os operarios e operarias e o sistema educativo. Ou sexa, que segundo el o aumento da produtividade non depende esencialmente da tecnoloxía e da investigación, da mellora da calidade e das redes comerciais. Esquece de xeito consciente que ter persoal mal pago e carente de alicientes, porque se quere rendibilizar ao máximo e a curto prazo o capital investido, prexudica á produtividade. En resumo toda a responsabilidade sería da clase traballadora que está chea de “persoas paradas, que se quedaron no chanzo de abaixo e non queren subir”. A desigualdade social é, para el, un problema individual, consecuencia da preguiza, en claro contraste cos/as emprendedores. Rosell recoñece que hai máis factores, mais estarían nun lugar secundario.

Read the rest of this entry »

A globalización estanos afogando!

Novembro 7th, 2017  |  Published in| the_category globalizacion, neoliberalismo, traballo

Segundo as estatísticas que ofrece o IGE encol da Multilocalización Empresarial na Galiza, das 1408 empresas con máis de 50 empregados/as que realizaban actividades no País, 323 tiñan a súa sede noutra comunidade autónoma. Ou sexa, un 23% do total. Aínda que o realmente significativo, ademais do seu peso na mediana e grande empresa, é que controlaban nada menos que o 34,1% da actividade económica (e polo tanto dos beneficios). Agora ben, pra termos unha idea máis achegada da incidencia do capital exterior, cómpre lembrar que hai moitas empresas con sede na nación galega que son propiedade de capital foráneo. Como exemplo diso temos dúas emblemáticas: Abanca e Pescanova.

Read the rest of this entry »

Que provoca o déficit nas pensións?

Novembro 2nd, 2017  |  Published in| the_category publico, sociedade, traballo

O informe do FMI sobre o Estado español recoméndalle ao Goberno que retarde a idade de xubilación, que non actualice as pensións, e que limite o seu incremento nun 0,25% anual. O pretexto: o déficit do sistema. Este organismo internacional entende que esas medidas deberían manterse cando menos ate o ano 2022. Isto implicaría un retroceso importante nos ingresos das persoas pensionistas, xa que só nos últimos dous anos, co medre da inflación e un aumento limitado a 0,25% nas pensións, estas perderon este ano e os dous anteriores un total de 5% de poder adquisitivo. Este retroceso súmase ao 3% que minguaron durante a crise.

Read the rest of this entry »

A Unión Soviética ollada pola clase traballadora (dende dentro)

Outubro 27th, 2017  |  Published in| the_category Historia, Internacional, soberania, traballo

Está próxima a conmemoración do centenario da Revolución Socialista en Rusia. Ou sexa, da toma do poder polos soviets, baixo a dirección do Partido Bolxevique. Foi sen dúbida un acontecemento que transformou a humanidade. Un cambio que permitiu unha mudanza na correlación de forzas a nivel mundial e un avance inmenso, tanto na xustiza social, como nos dereitos nacionais. A profunda transformación da Unión Soviética, a loita heroica contra o fascismo, a costa de 27 millóns de vidas, deixou o capitalismo imperialista sen máscaras e debilitado, e permitiu un salto cualitativo despois da Segunda Guerra Mundial. Os avances da clase obreira en todo o mundo, e os procesos de liberación nacional, foron posíbeis grazas á consolidación dun amplo bloque de estados socialistas e de democracias populares. Estas conquistas permitiron albiscar un futuro cun mundo máis xusto, igualitario, solidario, no que as clases populares e os povos fosen os protagonistas.

Read the rest of this entry »

Pacto da Moncloa, Constitución e autonomías

Outubro 17th, 2017  |  Published in| the_category Historia, soberania, traballo

Nesta conxuntura acumúlanse tres crises: a económico-social, a democrática, e a nacional. Polas contradicións que estas xeran, o chamado por algúns “Réxime do 78” perdeu a capacidade que tiña pra manter sen contratempos a viabilidade dos intereses das clases dominantes. En calquera caso, pra alén das valoracións que fagamos no específico, sobre cales deben ser as saídas ao conflito catalán, este amosa o esgotamento dos acordos de governabilidade de hai catro décadas. Están en cuestión o marco económico-social, as regras democráticas, e o papel das nacionalidades. Lembremos que unha parte do nacionalismo xa considerou daquela o Estado das Autonomías como unha simple e insuficiente descentralización administrativa. As súas eivas agraváronse coa LOAPA primeiro, e coa entrega de competencias á UE despois.

Read the rest of this entry »

Lusco e fusco das municipais portuguesas

Outubro 13th, 2017  |  Published in| the_category europa, política, soberania, traballo

Os resultados das eleccións municipais en Portugal veñen ratificar a corrección das políticas anti-austeridade, que o Partido Socialista (PS) se vira forzado a pactar co Partido Comunista Portugués (PCP) e máis o Bloco de Esquerda (BE). As concesións que fixo garantíronlle a Antonio Costa ser nomeado Primeiro Ministro en decembro 2016, impedindo que Passos Coelho, de centro dereita (PDS) se mantivese no cargo. Téñase en consideración que o actual Presidente do país, Marcelo Rebelo de Sousa (elixido en marzo 2016), está ligado ideoloxicamente ao PDS, polo que existe unha cohabitación, ou reparto do poder. Ademais, cómpre lembrar que durante o governo de José Sócrates (2005-2011), o PS aplicou todas as receitas de axuste propostas pola Comisión Europea e máis o BCE, e tendo finalmente que dimitir por unhas acusacións de corrupción, polas que foi condenado.

Read the rest of this entry »

Distribución da renda e pensións

Outubro 12th, 2017  |  Published in| the_category neoliberalismo, sociedade, traballo

Unha boa parte das familias galegas están integradas por pensionistas. E ademais, deles dependen para sobrevivir moitas persoas que se atopan no desemprego (un 40% destes últimos leva máis de dous anos no paro). Polo tanto, as pensións son unha cuestión importante, máxime nun país avellentado como Galiza. Daquela que as políticas regresivas que aplica o Goberno teñen un efecto moi grave, que vai en aumento co paso dos anos. Teñamos en consideración que os crecementos serán inferiores ao medre do IPC, neste e nos próximos anos, segundo os analistas. Por outra banda as pensións galegas xa son das máis baixas do Estado español. Só nos últimos seis anos, perderon un sete por cento do seu poder adquisitivo.

Read the rest of this entry »

Oportuna cortiña de fume

Outubro 10th, 2017  |  Published in| the_category economía, soberania, sociedade, traballo

No debate sobre o Estado da Autonomía, o Presidente centrou boa parte da súa intervención no conflito entre o Governo español e Catalunya, desviando a atención dos moitos e graves problemas que ten o noso país. Segundo a súa visión, Galiza sería a cara boa, tanto no aspecto democrático como no económico-social. E Catalunya, unha nación sometida a unha minoría que, nunha arroutada, provocou a ruptura social, e non respecta a democracia. Este foi o guión de Núñez Feijóo e o seu partido sobre o que debía ser o resume final do debate, co engadido dalgunhas políticas que transmitisen unha sensación de avance. Estas medidas concretaríanse na atención a máis 10.000 dependentes e a oferta de contratación de 14.000 funcionarios/as ate o ano 2020.

Read the rest of this entry »

Galiza, país industrial

Outubro 3rd, 2017  |  Published in| the_category economía, soberania, traballo

Segundo o director do IGAPE, creáronse dende maio de 2015 nada menos que 11.500 empregos no sector industrial. Ou sexa, en pouco máis de dous anos completouse un 23% do que a Xunta se marcaba como meta nun lustro, na Axenda de Competitividade de Galiza Industria. Polo que, pra completar o obxectivo, habería que triplicar o crecemento ate o ano 2020. A meta ten fundamento, dadas as potencialidades da nosa nación en recursos primarios e enerxéticos, polo que atinxir o 20% de povoación ocupada na industria non tería que ser unha utopía. Se fose así só seriamos superados por Navarra (27,2%), Rioxa (23,3%) e o País Vasco (22,9%). Óllese que estas últimas están na área de incidencia de Bilbao.

Read the rest of this entry »

Nova contra-reforma laboral á vista

Setembro 29th, 2017  |  Published in| the_category europa, neoliberalismo, traballo

O pasado venres, Emmanuel Macron, presidente de Francia, asinou varios decretos de reforma laboral que non foron debatidos na Asemblea Nacional, xa que previamente esta outorgoulle esa facultade. Trátase de cambios que terán unha inmediata e profunda repercusión en Francia, e a medio prazo no conxunto da Unión Europea e en todo o mundo. Son un paso máis nun escenario construído á imaxe do gran capital transnacional, que hoxe ten un inmenso poder económico, mediático e político. Non se pode obviar, que estas reformas laborais regresivas están en sintonía coas realizadas antes no Estado español e coas que se acaban de aprobar en Brasil, a primeira potencia industrial de América Latina, coincidindo coa decisión de Temer de privatizar as principais empresas públicas.

Read the rest of this entry »

Interdependencia entre pensións e salarios

Setembro 19th, 2017  |  Published in| the_category globalizacion, neoliberalismo, sociedade, traballo

As noticias reflicten estes días que as pensións perderon un 1,35% do seu valor respecto de 2016. Foi así porque o seu crecemento de 0,25% ficou por baixo do medre do IPC. Agora ben, a este descenso hai que sumar o dos últimos seis anos: – 7%. O Governo pretende que esta tendencia regresiva se manteña ate o 2022. Tampouco dá garantías de que despois vaia ser distinta. O pretexto é que baixaron os ingresos á Seguridade Social debido á crise, e que as xubilacións medran máis rápido que a recadación do sistema, ao que engaden a queda demográfica. Este diagnóstico carece dunha visión de conxunto, e ten un obxectivo premeditado: xustificar o transvase dos recursos da clase traballadora (activa e inactiva), ás rendas do capital, que non paran de inzar.

Read the rest of this entry »

Un salario mínimo de mil euros

Setembro 7th, 2017  |  Published in| the_category neoliberalismo, traballo

En novembro do ano pasado, o Congreso aprobaba unha proposición de lei de Podemos, que contou co apoio do PSOE, co obxectivo de aumentar o salario mínimo interprofesional (SMI) ate os 950 euros para o ano 2020. Porén, a disolución das Cortes impediu a súa tramitación. E o pacto posterior entre PP e PSOE, fixou o SMI en 707,6 euros ao mes en 14 pagas. Semella que isto afogou o debate. Algo que ten lóxica, porque os acordos previos entre os partidos da oposición con maior representación parlamentar partían dunha postura tímida e incoherente. Asemade, téñase en conta que a Carta Social Europea propón que o SMI corresponda ao 60% do salario medio. Ou sexa, no caso do Estado español, serían 933 euros en 14 pagas. Máis de 200 euros por riba do pactado entre o PP e o PSOE.

Read the rest of this entry »

Rematou o axuste laboral?

Setembro 5th, 2017  |  Published in| the_category economía, globalizacion, traballo

O Governo central está contente, inzado de optimismo, xa que medran o PIB, o emprego e os ingresos fiscais. O crecemento supera as previsións previas, tamén no referente ás exportacións de bens e servizos. Agora ben, aparecen algunhas diverxencias. Mentres Fátima Báñez di que chegou o momento de recuperar os salarios, Luís de Guindos chama a manter a austeridade, pra consolidar o crecemento. Non expresan diferenzas de fundo, só falta de coordinación. Ou que o Ministro de Economía fai de “poli malo”. A postura de De Guindos é sen dúbida a oficial.

Read the rest of this entry »

Igualdade de oportunidades? De que estamos a falar?

Agosto 31st, 2017  |  Published in| the_category economía, neoliberalismo, sociedade, traballo

De vagar, tanto os medios de comunicación hexemónicos, como unha parte importante dos alternativos, comezan a se parecer como dúas pingas de auga, no referente á relevancia que lle dán á explotación laboral. Todos eles, de cando en vez, analizan como se perde poder adquisitivo e medra a desigualdade nos salarios, como aumentan os contratos temporais e a tempo parcial, e polo tanto a precariedade. Mesmo destacan que o desemprego se volve estrutural (seica debido á robótica e á globalización, que converten nun proceso “natural”, á marxe das vontades dos grupos de poder). Mais en ambos os dous tipos de medios, e partindo dun enfoque aparentemente contraposto, ninguén chega a conclusións económicas, sociais e políticas que vaian ao fundo do problema e propoñan alternativas que repartan con xustiza o traballo e os ingresos.

Read the rest of this entry »

Natalidade e xustiza social

Agosto 23rd, 2017  |  Published in| the_category globalizacion, sociedade, traballo

Unha cousa é poñer en práctica medidas que solucionen os problemas, e outra moi distinta, ter unha mensaxe e realizar accións que non fan máis que paliar un chisquiño os efectos máis regresivos. Evidentemente, estas solucións demagóxicas, nas que o importante é a propaganda para saír do paso, son habituais cando a resolución do problema implicaría confrontar cos intereses das clases dominantes. Este é o caso do retroceso demográfico e das pensións na Galiza, xa que ambas cuestións dependen das condicións laborais, e moi especialmente do reparto do traballo e dos ingresos.

Read the rest of this entry »