globalizacion

As trampas da dependencia

Agosto 2nd, 2017  |  Published in| the_category economía, globalizacion, neoliberalismo

O Presidente Mariano Rajoy apresentou en rolda de prensa os últimos dados da EPA. Na mesma, lembrou asemade os do PIB e do comercio exterior, coa asistencia da totalidade do Goberno. A escenificación foi a propia dun momento transcendental, no que seica se demostraba na práctica o acerto das políticas do PP, tanto en relación co axuste no gasto social, como na regresiva reforma laboral. Medidas que el considera foron alicerce para o aumento do PIB de máis do 3% anual, para que crezan as exportacións, e para un forte medre da poboación ocupada.

Read the rest of this entry »

Catalunya, a proba do algodón

Xullo 12th, 2017  |  Published in| the_category globalizacion, nacionalismo, soberania

Como se resolva o conflito catalán, por mor da convocatoria do 1 de outubro, terá unha gran importancia política. Asemade, será transcendente como se coloquen os partidos e organizacións sociais, tanto de Catalunya como doutras partes do Estado español, en relación con este tema. Todo indica que o PP e Ciudadanos, co apoio das clases dominantes, van impedir a realización do referendo utilizando todos os medios que sexan necesarios. A pregunta é: chegaran á intervención do Goberno autonómico e á disolución do Parlament? Con esta decisión, o Goberno central impediría que a proposta de independencia fose reforzada co voto explícito do pobo catalán no referendo. Porén, reflectiría ao mesmo tempo que o Estado español nega a Catalunya o dereito a decidir sobre o seu futuro. Ficaría en evidencia que son un pobo refén das decisións tomadas por outros territorios, cos que foron asociados en contra da súa vontade.

Read the rest of this entry »

A cuestión demográfica

Xullo 4th, 2017  |  Published in| the_category globalizacion, migracion, sociedade

Na Galiza, hai 29 anos que nacen menos persoas das que morren. Unha traxedia. No Estado español isto acontece por segundo ano consecutivo, e xa están alarmados. Este problema afecta á periferia no Estado, xa que Madrid, Barcelona, e Valencia, non padecen esta eiva. En calquera caso, o fenómeno amosa unha tendencia que vai a máis, e que contradí o optimismo dos que ollan na globalización neoliberal un futuro de progreso. Ademais, a evolución demográfica non só é negativa nos territorios con maior desigualdade social e desemprego, algo lóxico, senón que xa afecta practicamente a todo o continente, por mor das políticas laborais e sociais regresivas. Cando non ocorre así, trátase de excepcións. Cun avance tan forte da concentración e centralización da riqueza e do poder, non podía ser doutro xeito.

Read the rest of this entry »

Auxe da mobilización obreira

Xuño 29th, 2017  |  Published in| the_category globalizacion, neoliberalismo, traballo

Hai cuestións que afectan todos os aspectos da vida das persoas, como as relativas ás condicións laborais, o desemprego, as pensións, os servizos públicos, e os ecosistemas, a cultura e lingua. Mais, ás veces son colocadas nun segundo plano. Especialmente cando a noticia vai para alén do problema, e se teme que sirva de exemplo e dea pulo á mobilización. Nas últimas semanas resulta difícil obviar o aumento das accións reivindicativas da clase obreira, a prol de traballo digno e do aumento dos salarios.

Read the rest of this entry »

Unha siria dividida?

Xuño 20th, 2017  |  Published in| the_category globalizacion, Internacional, militarismo

As grandes axencias de noticias colocan os focos no terrorismo xihadista nos países occidentais, así como nun pretendido expansionismo ruso, eludindo tratar as causas e as traxedias da guerra en Siria, Libia, Iemen, por poñer algúns exemplos. Quérese sementar na conciencia colectiva que os xihadistas e Rusia están asociados no mundo do mal. Porén, Moscova destaca como a potencia que mantén unha actitude máis belixerante contra o terrorismo, mentres que os Estados Unidos, pola contra, así como Arabia Saudita, Qatar, Emiratos e Turquía, axudaron a crear ou alentaron estas organizacións terroristas, como Al Qaeda e o Estado Islámico (EI). Evidentemente, esta mensaxe non é casual e serve de escusa pra intervir en Siria e outros países. Facer de Rusia o novo inimigo estratéxico permite dar folgos aos gastos no complexo industrial militar, un sector no que Washington ten a hexemonía.

Read the rest of this entry »

Pastor-Popular, capitalismo en estado puro

Xuño 16th, 2017  |  Published in| the_category economía, globalizacion, neoliberalismo

Seica para evitar un mal maior, vendeuse con nocturnidade e por un euro o Banco Popular-Pastor ao Santander, cunha saída á carta e coa complicidade do Banco Central Europeo e do Governo español. Con seguridade esta operación terá unha forte repercusión sobre a economía e o emprego na Galiza. Malia que o segundo de abordo do Santander diga que ambas as entidades seguirán a funcionar coas súas marcas, semella que se trata de verbas dirixidas a tranquilizar os/as clientes, e gañar tempo para artellar un plano que elimine as duplicidades negociando cos sindicatos e adiantando xubilacións. E se esta vía non funciona irán pola brava. Crer que non vai ser así, sería ignorar a tendencia dominante no sector bancario que elimina oficinas e reduce ao máximo o cadro de persoal. Algo que está facendo o Santander neste mesmo intre. No noso país, o Pastor-Popular conta cunha nómina de 1.400 persoas, polo que a perda de postos de traballo pode ser considerábel.

Read the rest of this entry »

A democracia na versión do capital

Xuño 15th, 2017  |  Published in| the_category economía, globalizacion, neoliberalismo

Caracterizar a nosa nación equivale a falar da xente, do modelo económico, do tipo de sociedade, da cultura, da historia, da lingua, da capacidade de decidir. Todos estes son aspectos interrelacionados. Polo tanto, non é algo indiferente, nen secundario, que o Banco Pastor fose absorbido no seu día polo Popular (con algunha condición, como manter o nome e oficinas). Tampouco o é agora que este último sexa regalado ao Santander, coa bendición do Banco Central Europeo, do Goberno do Estado e da Comisión Europea. Unha operación de “salvamento” que non ten un fin solidario, porque o que prima nas corporacións son os dividendos, inmediatos e futuros. Asemade, en moi poucas décadas, e coa entrada na UE, as grandes empresas con capital galego foron desaparecendo. Fíxose estrutural a crise demográfica e a perda de peso no PIB do Estado español. Non semella casual, senón consecuencia da suma de globalización e falta de soberanía.

Read the rest of this entry »

A maioría sistémica está garantida en Francia

Xuño 8th, 2017  |  Published in| the_category europa, globalizacion, neoliberalismo

Todo parece indicar que nas vindeiras eleccións lexislativas na Francia, para alén dos resultados concretos que acaden as siglas do grupo que apoiou a Emmanuel Macron para a presidencia, este vai ter garantido o apoio ao seu programa durante o mandato. Ate agora, foi quen de arrastrar boa parte do Partido Socialista e personalidades da dereita. E con seguridade, tecerá sen moita dificultade acordos con ducias de políticos locais que teñen garantida a elección no seu distrito á marxe da marca política coa que se presenten.

Read the rest of this entry »

O exemplo portugués

Maio 30th, 2017  |  Published in| the_category europa, globalizacion

Os nosos irmaus do sur son hoxe unha referencia pra os partidos de esquerda doutros países da Unión Europea, especialmente despois da evolución tan negativa de Syriza en Grecia. E con seguridade, alentará aínda máis esta impresión positiva que Bruxelas retire Portugal da lista negra de países con déficit excesivo, na que en troques mantén o Estado español. Mais o aspecto de maior importancia son os dados sobre a evolución das condicións laborais. A taxa de desemprego era de 10,1% no primeiro trimestre, fronte ao 12,7% no ano 2015. O salario medio no ano 2016 foi de 17.521 euros, un 1,39% máis que o ano anterior. Reverteuse a tendencia regresiva do anterior governo de dereita (CDS-PP). Téñase en consideración que na Galiza, a taxa de paro é do 17,4%, e os salarios aumentaron só o 0,2% no ano 2016.

Read the rest of this entry »

Os retos dun triunfo meritorio

Maio 25th, 2017  |  Published in| the_category europa, globalizacion, política

O triunfo de Pedro Sánchez, enfrontando a oposición dos medios de comunicación hexemónicos e do aparello do partido, incluídos a maior parte dos baróns e as contraditorias “vellas glorias”, ten mérito. Será quen de superar a fenda interna e virar á esquerda como prometeu na súa campaña? Sen dúbida, é cedo para dar contestación a este interrogante a esta altura. Mais o certo é que, cando menos no discurso, terá que recoñecer o carácter plurinacional do Estado, amosar que quere rematar co Goberno da dereita, e poñer en primeiro plano cuestións como a precariedade laboral, o salario mínimo, e outros aspectos sociais e democráticos.

Read the rest of this entry »

Rexurde a loita obreira no Brasil

Maio 13th, 2017  |  Published in| the_category américa latina, globalizacion, neoliberalismo

A atención internacional está centrada neste intre nas eleccións francesas, no conflito de Trump con Corea do Norte, na negociación do Brexit a cara de can, e na situación de Venezuela. Daquela que a folga xeral no Brasil ficase nun segundo plano. Porén, é un feito que terá repercusións internas e tamén na rexión, tendo en consideración que é a maior potencia de América Latina. Polo tanto, todo parece indicar un cambio de tendencia na actitude da clase traballadora. Máxime se temos en consideración o éxito da folga do día 6 de abril na Arxentina. En ambos os casos, son protestas masivas que cuestionan executivos claramente neoliberais e submisos a Washington. Dous países que, ate hai pouco tiñan gobernos progresistas que foron substituídos, en Arxentina mediante procesos electorais moi tensos, ou por un golpe parlamentar con apoio xudicial no Brasil.

Read the rest of this entry »

Todo depende da correlación de forzas

Abril 29th, 2017  |  Published in| the_category economía, globalizacion, neoliberalismo

Se temos en consideración a situación laboral, as manifestacións do 1º de maio terían que ser masivas, porque a precariedade non deixa de medrar e os salarios manteñen a tendencia á baixa. Practicamente todo o crecemento do PIB é absorbido polo capital, cada vez máis concentrado e centralizado (unha gran parte das empresas galegas pasaron a mans de capital foráneo nestes anos), co que isto implica en relación á investigación e ao afastamento dos centros de decisión.

Read the rest of this entry »

Democracia formal

Abril 27th, 2017  |  Published in| the_category europa, globalizacion, neoliberalismo, política

Os mercados e a burocracia da UE respiran tranquilos, porque nas eleccións francesas Emmanuel Macron colocouse en primeiro lugar, malia que a distancia a respecto de Marine Le Pen sexa mínima. Asemade, con toda seguridade o candidato de En Marche! sairá elixido en segunda volta, dado que conta co apoio explícito do conservador Fillon, e de Hamon, candidato oficial do Partido Socialista. Polo tanto, estaría garantida a gobernanza da opción máis neoliberal na Francia, a segunda economía da UE e potencia nuclear, sen necesidade de facer ningunha concesión a outras alternativas, dado o carácter presidencialista do sistema político.

Read the rest of this entry »

A vía militarista no capitalismo senil

Abril 21st, 2017  |  Published in| the_category globalizacion, militarismo, neoliberalismo

Non se pode afirmar que a preeminencia do aspecto militar nos Estados Unidos sexa consecuencia da elección de Donald Trump. Xa Barack Obama e Hillary Clinton destacáranse por iniciar ou alentar varias guerras (Libia, Siria, Ucraína, Iemen, etc.). Mais co actual presidente norteamericano, todo indica que este será o aspecto central da política norteamericana nesta etapa. Non é unha novidade, en moitos momentos da historia da humanidade o futuro decidiuse a través das armas. Tampouco se pode ignorar que se o dólar segue a ser a moeda de referencia, é en gran medida porque os Estados Unidos son a potencia hexemónica no eido militar. En última instancia, o militar é o que decide a correlación de forzas, non quen ten a razón, nen quen conta cunha economía máis poderosa. Aínda que este factor vaia asociado xeralmente ao militar.

Read the rest of this entry »

Tamén emigran os capitais

Abril 20th, 2017  |  Published in| the_category economía, globalizacion, neoliberalismo

No último ano, o diferencial entre as saídas de capitais, para alén das fronteiras do Estado español, multiplicaron por 11,4 as entradas. Ou sexa que non só emigran as persoas, tamén os recursos, co que isto implica como hipoteca para o desenvolvemento da Galiza. Concretamente entraron 118,2 millóns de euros e saíron 1.343,6 millóns, no ano 2016. Claro que esta é unha visión parcial. Non ten en consideración o fluxo de capitais entre o noso país e o Estado español, que con seguridade é outro tanto en contía, e cun carácter negativo semellante. A estes aspectos regresivos, hai que sumar ademais o feito de que un número considerábel de empresas foi mercado por capital foráneo, co que isto implica en exportación de beneficios.

Read the rest of this entry »